SOLA 2024

 

S’ Esse isch immer super gsi,

S Sola isch aber leider trotzdem scho verbii!

Über s aller beste Sola wend mir jetzt schribe,

i dem tolle Lager würded mir am liebste für immer bliibe.

D Ufbaucrew isch richtig früeh ufem Lagerplatz acho

De Rege het aber au nöd lang uf sich warte loh!

Vergrösseret het sich de ersti Matsch ganz schnell,

fast vo do bis uf Bischofszell.

Aber eigentlich sind mir jo z Häggeschwil,

das isch üses echte Ziel.

S Velofahre isch nöd nur fürd TCler astrengend gsi,

au bi de Jungschärler hets es paar Müedi debii.

Findet me d Gruppe mitem gliiche Sugus,

stoht me zeme und seit: «Gugus!»

Di ganzi Wuche bliibed die «Gruppe»

ob gwünne, verlüre oder unentschiede, mit de Beste isch üs da Schnuppe.

Mit Herdöpfel simmer los zum Velofahre,

im Verlauf vom Tag simmers go itusche i Teigware.

Am Obig no e Schoggi im Wald versteckt,

di eint Gruppe het sich mit drü Taflene ideckt.

Zwüschetdure hemmer dörfe Fähigkeite erwerbe,

üsi Solamotivation het do niemer me chöne verderbe.

Abseile, jo das macht Spass,

über de Hang durab, was söll denn das?

Neui Tshört, das mueses geh,

süs chame üsi Stempel gar nöd gseh.

Chnöpfe, Morse, Tarne, yeee

Verstecke, Füürle, Gebärde und no vieli meh.

Eh Nochricht übermittle mit verschiedene Methode,

das chömmer guet und sogar ohni froge!

Ide Sugusteams Fackle produziere,

und denn vorem Pseudogwitter ufem Waldweg umeflaniere!

De Wachs de tropft und lauft ufd Händ,

s isch guet, het sich niemer verbrennt!

Am Lagerfüür gits immer gueti Gschichte,

aber me mue s Holz defür vorher go richte!

De Angelino und de Mike, das sind zwei glatti,

bringed viel Witz, wenn au nu no platti!

Was üs dur s ganze Sola begleitet het,

isch Schoggi, Schoggi, jede wett!

Bi jedem Spiili hetme chöne gwünne vo dene Bretter, dene bruune,

S Schoggifondue het denn ghobe üsi Luune.

Zwor hemmer nume ein Gasomat 3000,

s Esse usem Holzomat isch jedoch au nöd grusig.

Wasser isch vom Himmel gheit,

und vieli Chind hend ihri Kleider verleit.

Dass s Gwitter genau d Saunaziit trifft,

choge dumm, weme usechunnt unds schifft.

Am Samstig sind d Leiter plötzli verschwunde,

denn dörfed d Teilnehmer mol de Lagerplatz erkunde.

Bis sie de Hiwiis finded und sich uf de Weg mached,

d Leiter i irne Versteck is Füstli lached.

Noch de Schnitzeljagd gits Wienerli und Brot,

so sind d Teilnehmer zum Glüück nöd gstorbe am Hungertod.

Und jetzt wird gfiiret, gfästet, lecker gesse,

und üs mit üsne kreative Fähigkeite gmesse.

De besti Abschluss chunnt erst hüt,

es machts us, mit de coole Lüüt.

Danke fürs ALLEBESTE SOLA, wos je hets gits,

chum doch nöchst mol mit, den bisch du Teil vo üsne Witz.